• رقم التليفون

  • 16741

  • العنوان

  • 66 ش حسن مأمون مدينة نصر

  • البريد الالكترونى

  • info@royalgateegypt.com

أفضل أماكن لقضاء شهر العسل

أفضل 13 مكان تقضي فيهم شهر العسل في مصر

13 مايو 2018

ناس كتير بقت بتفضل أنها تقضي شهر العسل في مصر لأن بلدنا فيها أماكن كتير جميلة واحنا نفسنا كمصريين ممكن نكون مكتشفنهاش، دة غير أنها بتوفر عليك فلوس كتير ممكن تصرفها برا. فعلشان كدة بروبرتي فايندر بتقدملك 12 مكان ممكن تقضي فيهم أحلى شهر عسل من غير ما تخرج برا البلد.

لو حابب تقضي شهر العسل في مكان جميل وهادي بعيد عن الدوشة والزحمة، يبقى لازم تزور الأماكن دي:

مرسى علم

بالرغم من أنها مدينة جديدة إلا أنها رائعة الجمال، وجذبت السياح ومحبي البحر الأحمر بشكل كبير علشان فيها معالم مميزة زي وادي الجمال، و ضريح أبو حسن الشاذلي، وجبل حماطة اللي بيتميز بوجود شجرة المانجروف النادرة والحيوانات البحرية.

الأنشطة الرياضية والترفيهية: رحلات السفاري، تأجير القوارب، والغوص لأن شواطئها تعتبر من أجمل الشواطئ بالعالم والمياه هناك صافية جدا. دة غير ان فيها دلافين وحيتان وجزر مميزة جدا زي جزيرة شهاب الفستون وخوار وجزيرة الروكي والزبرجد.

أشهر المنتجعات والفنادق في مرسى علم: منتجع ذا ثري كورزنرز اكوينوكس، ومنتجع لاجونا بيتش، وماجيك توليب بيتش، والفيستون ريزورت، ومنتجع بلو ريف، وريحانة جيست هاوس، وشاطئ شمس علم، واورورا باي ريزورت.

الأسعار: متوسط سعر الغرفة في اليوم بيتراوح من 1000 – 3000 جنيه حسب المكان اللي هتنزل فيه. يعني لو هتقعد انت وعروستك هناك لمدة اسبوع 

دهب

ودي من الوجهات السياحية المفضل لكل المصريين تقريبا عشان بسيطة وفيها مناظر طبيعية رائعة وأسعارها  في نفس الوقت معقولة جدا بالمقارنة لأي مكان تاني في مصر، وتقع في خليج العقبة بجنوب سيناء.

الأنشطة الرياضية والترفيهية: وتعتبر دهب مركز عالمي للغطس، فلو عايز تعمل دايفينج أو سنوركلينج هناك مع عروستك يبقا هتزور البلو هول، وأبو جالوم، والثري بولز، والبلو لاجون، وكانيون.ومن الأنشطة المشهورة هناك كمان الهايكينج والسفاري.

  • مينفعش تروح دهب من غير ما تزور لاجونا بيتش و”ايفري داي كافيه”.

أشهر المنتجعات والفنادق في دهب: جاز دهبية، وأوريكانا، وسويس ان ريزورت دهب، وأكاسيا دهب، وتروبيتل دهب اوازيس ريزورت، وبلو بيتش كلوب، وميريديان دهب.

الأسعار: سعر الغرفة الواحدة في دهب بيبدأ من 350 جنيه في اليوم، وميزانيتك بتظبطها حسب المكان اللي هتنزل فيه والأنشطة اللي هتعملها، يعني ممكن تتبسط هناك ب 2000 جنيه بس  في اسبوع وممكن تصرف برده 7000 جنيه 

واحة سيوة

ودي من أجمل الأماكن الموجودة في الصحراء الغربية لدرجة ان في ناس كتير بتقول عليها “جنة الله على الأرض” من كتر جمالها، فبالرغم من أنها صحراء قاحلة إلا أنك هتلاقي هناك كل ما يبهر العين زي الخضرة والينابيع الحارة والبحيرات، دة غير أشجار النخيل وأشجار الفاكهة والزيتون المنتشرة في كل أنحاء سيوة.

الأنشطة الرياضية والترفيهية: رحلات السفاري، التزحلق على الرمال، ركوب العجل، تسلق جبل الدكرور، السباحة في حمام كليوباترا وجزيرة فطناس، الاستمتاع بالقعدات البدوية البسيطة، وزيارة أهم المعالم في سيوة زي جبل الموتى، ومعبد آمون، وقلعة شالي.

أشهر المنتجعات والفنادق في سيوة: سيوة سفاراي بارادايس السياحية، وسيوة سفاري جاردنز، وسيوة بارادايس، وطغاغين ايلاند ريزورت، وسيوة شالي ريزورت.

الأسعار: سعر الغرفة الواحدة بيكون في حدود 900 جنيه، فلو هتقعد هناك لمدة 7 ايام مثلا ممكن تاخد معاك مبلغ في حدود 7000 – 10.000 جنيه.

راس شيطان       

راس شيطان هي عنوان الجمال الطبيعي لأنها بتشتهر بالجبال والوديان والشواطئ الساحرة والكهوف الطبيعية وبتطل على خليج العقبة، وعلشان كدة هي مميزة عن أي مكان تاني.

الأنشطة الرياضية والترفيهية: هايكينج، سفاري، الصيد، التجديف، الغوص، يوجا، ميديتيشن أو “جلسات التأمل”. وممكن كمان تاخد جولة في الأماكن القريبة من راس شيطان زي دير سانت كاترين، وجبل موسى، قلعة الترابين، وواحة عين خضرة.

اماكن الاقامة في راس شيطان:  راس شيطان مفيهاش فنادق ولا منتجعات لأنها عبارة عن 6 كامبات مرصوصة جمب بعض ومرتفع شوية عن الأرض. ومن أكتر الكامبات اللي الناس بتحب تزورها هناك عياش كامب، وروك سي كامب، وكاسل بيتش كامب.

الأسعار: الأسعار هناك مش بتزيد عن 250 – 300 جنيه لو هتقضي هناك 3 ايام وبتكون شاملة وجبة الفطار والغدا والعشا.

حلايب وشلاتين

ناس كتير متعرفش الأماكن دي لأنها اداريا تابعة لمصر ولكن في صراع عليها ما بين السودان ومصر لأنها تقع على الحدود الرسمية بينهم. وبالرغم من أن المناطق دي بسيطة الا ان فيها مناظر طبيعية وخضرة وجبال مش موجودين في أي مكان تاني.

الأنشطة الرياضية والترفيهية: سفاري، وتسلق جبل علبة، وزيارة محمية علبة ومنطقة الدئيب ومنطقة ابرق، ومنطقة عريقات، وسوق جمال الشلاتين.  

أماكن الاقامة في حلايب وشلاتين: الأماكن دي مفيهاش أي فنادق أو منتجعات، دة غير انهم يعتبروا من الاختيارات المثالية لهواة التخييم.

الأسعار: لو هتقعد هناك لمدة 3 أو 4 أيام، يبقا ميزانيتك لازم تكون في حدود 2000 – 3000 جنيه.

بساطة

ودي من الأماكن البسيطة والجميلة في سيناء، بتطل على البحر وبتتميز بالطراز البدوي برده، وعلشان كدة اتسمت بالاسم دة. هناك هتلاقي الحياة البدائية البسيطة والهدوء والسلام النفسي اللي من العصب جدا تلاقيه في المدن الكبيرة. الفرق بين بساطة وبين أي مخيم تاني في سيناء انك هناك بتخدم نفسك بنفسك.

الأنشطة الرياضية والترفيهية: الناس بتروح هناك أغلب الوقت علشان تستجم وتنزل البحر وطبعا هتلاقي ناس كتير بتروح هناك تعمل يوجا.

اماكن الاقامة في بساطة: هناك مفيش فنادق برده، وأغلب الناس بتقعد هناك في أكواخ أو بتجيب الكامبات معاها علشان تستمتع بتجربة التخييم.

الأسعار: لو هتقعد هناك 3 أيام ممكن تاخد مبلغ في حدود 1000 جنيه، ولو ناوي في يوم تتغدى في كاسل زمان يبقا الأفضل انك تزود الميزانية شوية وتاخد معاك 2000 جنيه مثلا.

الاسكندرية

الاسكندرية من أحلى الأماكن اللي ممكن تروحها لو بتخطط أنك تقضي شهر العسل في مصر لأنها ثاني أكبر مدينة فيها، دة غير انها معروفة ب”عروس البحر المتوسط” أو “لؤلؤة المتوسط” بسبب حلاوتها وجوها الجميل وشواطئها الصافية.

الأنشطة الرياضية والترفيهية: السباحة، وزيارة مكتبة الاسكندرية، وقصر المنتزه، والمعمورة، ومتحف المجوهرات الملكية، قلعة قايتباي، ومتحف الاسكندرية القومي، والمسرح الروماني، والمتحف اليوناني، ومقابر مصطفى كامل، وعمود السواري.

أشهر الفنادق والمنتجعات في الاسكندرية: سيدي جابر، وفندق هلنان فلسطين، وفندق شيراتون المنتزه، ومنتجع ايفو، وبرادايس ان المعمورة.

الأسعار: لو هتقعد في اسكندرية اسبوع وبتدور على مكان يكون في حدود 11.000 – 16.000 جنيه يبقا فندق شيراتون المنتزه وهلنان فلسطين الاختيار الأمثل ليك لكن لو ميزانيتك في حدود 6000 – 9000 جنيه يبقا احجز غرفتك انت وعروستك في شقة سيدي جابر أو فندق بارادايس ان المعمورة او ايبروتيل برج العرب.

القصير

ودي مدينة جديدة في محافظة البحر الأحمر واتسمت بالاسم دة لأنها أقصر مسافة تربط بين صعيد مصر والبحر الاحمر.

الأنشطة الرياضية والترفيهية: السباحة لأن شواطئها هادئة والمياه صافية جدا، وزيارة معالم المدينة زي ضريح الشيخ أبي الحسن الشاذلي، والأثار الاسلامية زي القلعة ووادي الفواخير.

أشهر الفنادق والمنتجعات في القصير: يوتوبيا بيتش كلوب، وروحانو بيتش ريزورت، وروتس لاكشيري، ومانجروف باي ريزورت، وسيلفر بيتش، وكلوب كاليميرا اكاسيا سويس ريزورت، وموفنبيك القصير، وراديسون بلو القصير ريزورت، وبينسي رويال جاردن،

الأسعار: لو هتقعد هناك في مكان زي راديسون بلو أو روحانو أو منجروف لمدة أسبوع يبقى الاقامة هتكون في حدود 9000 – 1000 جنيه. انما لو بتدور على مكان حلو بأسعار أقل يعني في حدود 5000 جنيه مثلا يبقا كورال هيلز ريزورت، سيلفر بيتش القصير، ودريم بيتش، وفندق القصير هتكون الاختيارات الأنسب ليك.  

العين السخنة

ودي من أشهر الوجهات السياحية في البحر الأحمر وأقربها للقاهرة، يعني ممكن تكون هناك خلال ساعة ونصف بس. وبتتميز العين السخنة بشواطئها الجميلة والينابيع، دة غير انها بتتميز بكثرة العيون الكبريتية بها واللي بتستخدم كمان لعلاج أمراض كتير.

الأنشطة الرياضية والترفيهية: وهناك ممكن تستمتع بأنشطة كتير زي السباحة والغوص والتزلج المائي والتزلج على القوارب وزيارة جبل الجلالة ودة من أهم المعالم السياحية والدينية في العين السخنة.

أشهر الفنادق والمنتجعات في العين السخنة: العين السخنة فيها منتجعات كتير تحفة زي جنة الشواطئ، ومنتجع بورتو، وستيلا دي ماري، ولافيستا، وموفنبيك، وبالميرا، وفندق بورتريه العين السخنة، ومنتجع جاز ليتل فينيس جولف….ألخ.

الأسعار: لو ميزانيتك في حدود 20.000 – 25.000 جنيه وهتقعد هناك لمدة اسبوع يبقا ممكن تحجز اقامتك انت وعروستك في العين روتانا أو الماسة للشقق الفندقية أو مريكور جراند جبل حفيت. ولو بتدور على فندق بأسعار أقل يبقا فندق ايلا، وايلا جراند، وسيتي سيزونز العين، وتوب للشقق الفندقية، والماسة هتكون أنسب اختيارات ليك لأن أسعار الغرف هناك بتتراوح من 7000 – 9000 جنيه لو هتقعد هناك لمدة اسبوع.

راس سدر

راس سدر تعتبر من الوجهات السياحية المميزة في البحر الأحمر ودة لأن شواطئها صافية وهادية ورمالها ذهبية ناعمة، دة غير أنها بتضم حمامات وعيون مياه كبريتية طبيعية استشفائية.

الأنشطة الرياضية والترفيهية: الغوص، والسفاري، وركوب الأمواج (كايت سيرفينج)، وزيارة أهم المعالم زي حمامات فرعون الشهيرة وقلعة الجندي وعين رأس سدر الكبريتية وعين وادي تراقي وعيون موسى.

أشهر الفنادق والمنتجعات في راس سدر: موسى كوست، وجولدن بيتش، ولاهسيندا بلو لاجون، والنزهة بيتش، وريماس، وكايت سيرفينج جرين سدر وبتضم كل الخدمات اللي ممكن تحتاجلها انت وعروستك زي المطاعم والكافيهات والمحلات التجارية والنوادي الصحية….إلخ.

الأسعار: لو ميزانيتك في حدود 6000 – 1000 جنيه يبقا كايت سيرفنج جرين سدر وبارادايس راس سدر هتكون أحسن اختيارات ليك لكن لو ميزانيتك أقل وهتقعد هناك لمدة أسبوع ممكن تحجز غرفتك في نزهة بيتش أو موسى كوست أو بالم بيتش أو وايت هاوس.

أسوان

سيبك من الأقصر دلوقتي وخلينا في أسوان، أصلك لو بتدور على الحضارة والتاريخ ممكن تلاقيهم في الشتاء أو أي وقت طوال السنة، لكن أسوان فعلا من أكتر البلاد اللي ممكن تتبسط فيها بجنوب مصر ودة لأنها بتجمع ما بين الجمال والبساطة في نفس الوقت. دة غير ان جوها دافئ و ناسها طيبين وجدعان.

الأنشطة الرياضية والترفيهية: في أسوان ممكن تقضي يوم في مركب على النيل، أوتقعد في مكان حلو وتستمتع بأجمل الأطعمة.

  • – لازم تقضي يوم في القرية النوبية وتشوف الألوان المبهجة لبيوت أهل النوبة وتصاميمها الجميلة اللي هتخليك تحس انك مش عايز تمشي من هناك.
  • -زيارة معالم أسوان زي معبد فيله، وباب الكلابشة، والصوت والضوء، ومتحف النوبة، وأنماليا، وجزيرة سهيل، ومتحف النيل، والسد العالي
  • زيارة معبد أبو سمبل، وكوم امبو، والجزر النيلية، وجزيرة النباتات، ورمز الصداقة، وحديقة الأميرة فريال.

أشهر الفنادق والمنتجعات في أسوان: موفنبيك ريزورت أسوان، وفندق بسمة، وسوفوتيل لجند أولد كتركت أسوان، ونوبيان بيتش، وفندق النيل، وهلينان، وأوركيدا سان جورج، وفندق سارة أسوان.

الأسعار: أغلب أسعار الفنادق هناك بتتراوح من 3000 – 7500 جنيه لو هتقعد هناك لمدة أسبوع.

الغردقة

ودي من أكثر الأماكن اللي بيتردد عليها العرسان الجداد لأن فيها مجموعة كبيرة من أرقى المنتجعات السياحية في مصر، وبتحتل أكبر جزء على شاطئ البحر الأحمر.  

الأنشطة الرياضية والترفيهية:  السفاري والغوص وركوب الأمواج بالألواح الشراعية والتزلج على الماء بالمظلات وركوب العجل وركوب الخيل والهايكينج.

أشهر وأرقى المنتجعات في الغردقة: الجونة، سهل حشيش، خليج مكادي، سوما باي.

الأسعار: أسعار المنتجعات في الغردقة متنوعة جدا ولكن بشكل عام بتتراوح من 5000 – 20.000 جنيه في الأسبوع. 

شرم الشيخ  

ودي كانت من أوائل الأماكن السياحية اللي بيتوافد عليها السياح والعرسان وغيرهم لأنها كانت من المراكز الأساسية للغوص وبتطل على البحر الأحمر، دة غير انها بتجمع ما بين الطبيعة الخلابة واحتوائها على وسائل الراحة والرفاهية المختلفة.

الأنشطة الرياضية والترفيهية: الغوص، والسفاري، وركوب العجل، والتزحلق على المياه، والتزحلق على الرمال.

أهم المناطق الترفيهية في شرم الشيخ:

– لازم تزور خليج نعمة لأنه يعتبر من أهم مناطق الجذب هناك لأن فيه كل حاجة ممكن تحلم بيها زي المطاعم والكافيهات بكل أنواعها، وكافيهات، وأماكن للسهر وقعدات عربي وعروض استعراضية…ألخ.

– منطقة السوق القديم من الأماكن المميزة هناك لأن طرازها قديم وبيكون فيها محلات ومطاعم  مصرية مميزة، دة غير انك ممكن تشتري منه هدايا لعيلتك وبأسعار هايلة.

–  سوهو سكوير: هتلاقي فيه بليل عروض استعراضية رائعة وحفلات تنورة وممكن كمان تتمشى في “الشانزليزيه”.

– شرم الشيخ بتشتهر كمان بقرية التراث البدوي ودي بتتميز بحفاظها على الموروثات الثقافية البدوية وفيها كمان أماكن عائلية ومحلات تجارية ومسارح.

أشهر الفنادق والمنتجعات في شرم الشيخ: ريكسوس شرم الشيخ، ودريمز بيتش ريزورت، وفندق جاز بلفيدر، وايبروتيل بالاس، ومنتجع الفيروز، ودومينا كورال باي، وطمرة بيتش، هيلتون شاركس باي ريزورت، وجاز ميرابل بيتش.

الأسعار: لو هتقعد لمدة اسبوع في فندق 5 نجوم زي سافوي أو فور سيزوزن هتدفع مبلغ في حدود 35.000 جنيه – 50.000 جنيه، وفي فنادق تانية 5 نجوم بأسعار أقل بكتير زي ميرابل ريزورت ممكن تقعد هناك اسبوع وتدفع 7247 جنيه بس. انما لو ميزانيتك في حدود 1500- 3000 جنيه ممكن تنزل في فنادق 3 نجوم زي فالكون هيلز أو قرية قمر سيناء أو أربع نجوم زي دايف ان ريزورت.

 

 

تعليقات فيس بوك

اتصل بنا الان